ໃນຕອນເຊົ້າຂອງວັນທີ 10 ທັນວາ 2018, ທີ່ຜ່ານມາ ຢູ່ທີ່ສະຖາບັນພະລັງານທົດແທນ ແລະ ວັດສະດຸໃໝ່, ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດພິທີເປີດສູນຮຽນຮູ້ ແລະ ຂໍ້ມູນຂ່າວສານເຕັກໂນໂລຊີ ຊີວະມວນ ໂດຍໃຫ້ກຽດເຂົ້າຮ່ວມຂອງທ່ານ ປອ ຈັນແສງ ພິມມະວົງ, ຮອງລັດຖະມົນຕີ ກະຊວງວິທະ ຍາສາດ ແລະ ເຕັກໂນໂລຊີ, ມີຜູ້ຕາງໜ້າຈາກອົງການ UNIDO, ກົມອຸດສາຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ, ຫົວໜ້າກົມ, ຫົວໜ້າຫ້ອງການ, ຫົວໜ້າສະຖາບັນ ແລະ ພະນັກງານພາຍໃນກະຊວງວິທະຍາສາດ ແລະ ເຕັກໂນໂລຊີ.
ສະຖາບັນພະລັງງານທົດແທນ ແລະ ວັດສະດຸໃໝ່ ໄດ້ຮ່ວມກັບສູນຜະລິດທີ່ສະອາດລາວ ກັບ ກົມອຸດສະຫະກຳ ແລະ ຫັດຖະກຳ, ກະຊວງອຸດສາຫະກຳ ແລະ ການຄ້າ ໄດ້ເຂົ້າຮ່ວມການຈັດຕັ້ງປະຕິບັດໂຄງການຫຼຸດຜ່ອນການປ່ອຍອາຍເຮືອນແກ້ວອອກສູ່ຊັ້ນບັນຍາກາດໃນພາກອຸດສາຫະກຳ ໂດຍຜ່ານເຕັກໂນໂລຊີອັດເມັດ ສິ່ງເສດເຫຼືອເປັນພະລັງງານ ຊຶ່ງໂຄງການນີ້ໄດ້ຮັບທຶນສະໜັບສະໜູນຈາກກອງທຶນສິ່ງແວດລ້ອມໂລກ (GEF5), ຊຶ່ງໂຄງການມີໄລຍະເວລາທັງໝົດ 3 ປີ (2016-2018), ມູນຄ່າໂຄງການທັງໝົດ 1.278.539 ໂດລາສະຫະລັດ.
ສູນຮຽນຮູ້ ແລະ ຂໍ້ມູນຂ່າວສານ ເຕັກໂນໂຊີ ຊີວະມວນ, ແມ່ນຖືວ່າເປັນສູນລວມຂອງຂໍ້ມູນຂ່າວສານທີ່ຈຳເປັນທັງໝົດ ໃຫ້ແກ່ຫລາຍໜ່ວຍງານ ເຊັ່ນວ່າ: ສະຖາບັນການສຶກສາ, ສະຖາບັນຄົ້ນຄວ້າ, ນັກພັດທະນາໂຄງການ, ນັກລົງທຶນ ແລະ ຍັງສະໜອງການຝຶກອົບຮົມທີ່ຈຳເປັນໃຫ້ພາກສ່ວນທີ່ກ່ຽວຂ້ອງ ເຊັ່ນ: ອຸດສາ ຫະກຳ-ກະສິກຳ, ນັກພັດທະນາໂຄງການ, ຜູ້ສະໜອງ, ຜູ້ບໍລິໂພກ ແລະ ອື່ນໆ ຕາມຄວາມຕ້ອງການ.
ສູນຮຽນຮູ້ ແລະ ຂໍ້ມູນຂ່າວສານ ເຕັກໂນໂຊີ ຊີວະມວນແມ່ນສ້າງຕັ້ງຂຶ້້ນພາຍໃຕ້ການຮ່ວມມືຂອງສະຖາບັນພະລັງງານທົດແທນ ແລະ ວັດສະດຸໃໝ່ ແລະ ອົງການສະຫະປະຊາຊາດ ເພື່ອການພັດທະນາອຸດສາຫະກຳ. ສຂຮພ ມີບົດບາດ ແລະ ໜ້າທີ່ອັນຈຳເປັນໃນການດຳເນີນການຄົ້ນຄວ້າ ແລະ ການພັດທະນາ ພະລັງງານຊີວະມວນ ໃນເວທີການນຳໃຊ້ ແລະ ໝູນໃຊ້ ເຕັກໂນໂລຊີພະລັງງານຊີວະມວນ ປະສານສົມທົບກັບເຕັກໂນໂລຊີດັ່ງເດີມ ໃນການເປັນຕົວແບບ ໃນການນຳໃຊ້ ແລະ ເຜີຍແຜ່ການນຳໃຊ້ເຕັກໂນໂລຊີພະລັງງານທົດແທນ.
ສຂຮພແມ່ນໄດ້ຮັບການຊ່ວຍເຫລືອສະໜັບສະໜູນດ້ານການເງິນຈາກໂຄງການ ຫລຸດຜ່ອນທາດອາຍພິດເຮືອນແກ້ວໃນພາກອຸດສາຫະກຳ ໂດຍການນຳໃຊ້ເຕັກໂນໂລຊີອັດເມັດສີ່ງເສດເຫລືອ ທີ່ຈັດຕັ້ງປະຕິບັດຮ່ວມກັນກັບກະຊວງອຸດສາຫະກຳ ແລະ ການຄ້າ, ກະຊວງວິທະຍາສາດ ແລະ ເຕັກໂນໂລຊີ ແລະ ອົງການສະຫະປະຊາຊາດເພື່ອການພັດທະນາອຸດສາຫະກຳ, ໄດ້ຮັບການຊ່ວຍເຫລືອດ້ານການເງິນຈາກກອງທຶນສີ່ງແວດລ້ອມໂລກ ແລະ ດຳເນີນການເຄຶ່ອນໄຫວ ແລະ ບໍລິຫານງານໂດຍສູນຮຽນຮູ້ ແລະ ຂໍ້ມູນຂ່າວສານ ເຕັກໂນໂຊີ ຊີວະມວນ.
